Pas lajmit se makinat në Malin e Tomorrit kanë shkaktuar një trafik kilometrik, ka reaguar policia rrugore në Berat. Në një njoftim zyrtar, blutë u kanë bërë apel shoferëve që kanë parkuar automjetet pranë Teqes, ti lëvizin për të bërë të mundur zhbollikim e rrugës në ngjitje. Gjithashtu, policia ka kërkuar që shoferët tëvendosin numrat e telefonit në makinë, në mënyrë që të komunikojnë për të hapur rrugën.
“Policia Rrugore e Beratit nisur nga fakti se në aksin rrugor në drejtim të Malit të Tomorit vijon të ketë fluks të lartë të automjeteve, apelon për të gjithë përdoruesit e rrugës që të respektojnë rregullat e qarkullimit rrugor, të mos nxitojnë për të arritur në destinacion duke kryer parakalime të gabuara e manovra të rrezikshme në rrugë, të mos përdorin celularin gjatë drejtimit të mjetit, të mos drejtojnë mjetin nën efektin e alkoolit apo në gjendje të dehur, të vendosin rripin e sigurimit dhe kaskën mbrojtëse.
Gjithashtu i bëjmë thirrje të gjithë drejtuesve të mjeteve që kanë parkuar mjetet pranë Teqes, të afrohen pranë mjeteve të tyre pasi ka fluks të madh të automjeteve dhe parkimet fillestare do ndryshojnë për të bërë të mundur qarkullimin e automjeteve që janë në ngjitje.
Gjithashtu drejtuesit e mjeteve të cilët parkojnë mjetin dhe largohen të vendosin numrin e tyre të celularit në xhamin e mjetit në mënyrë që të telefonohen kur duhet të lëvizin mjetet”, njofton policia.
