Janë shoqëruar nga policia e shtetit dy persona dhe ka shpallur në kërkim një të tretë në kuadër të operacionit “Perimetri”. Të arrestuarit, me dy mjete tip “Benz” po transportonin 8 emigrantë të paligjshëm drejt vendeve të BE-së dhe në momentin që u pikasën nga Policia nuk iu bindën urdhrit për të ndaluar. Në prangat e efektivëve kanë rënë: K. P., 26 vjeç dhe B. B., 24 vjeç, banues në Tiranë, ndërsa në kërkim u shpall 27-vjeçari nga Rrësheni, i riu me iniciale K. Gj.
Prej kohësh në vend, Policia e Shtetit po zhvillon operacionin “Perimetri”, i cili ka si qëllim ndalimin e emigracionit të jashtëligjshëm të personave që kalojnë në Shqipëri, kryesisht nga Greqia për në Korçë, për të dalë më pas në Kosovë.
NJOFTIMI I PLOTË: Qarku Korçë Vijon operacioni policor i koduar “Perimetri”. Në vijim të këtij operacioni goditet një tjetër rast i veprimtarisë kriminale në fushën e dhënies ndihmë shtetasve të huaj për kalim të paligjshëm të kufirit, kundrejt fitimit. Transportonin 8 emigrantë të paligjshëm dhe nuk iu bindën urdhrit të policisë për të ndaluar, arrestohen në flagrancë 2 shtetas dhe shpallet në kërkim bashkëpunëtori i dyshuar i tyre. Strukturat për Hetimin e Krimeve në DVP Korçë, në bashkëpunim me Policinë Kufitare dhe shërbimet e Komisariatit të Policisë Maliq, në vijim të operacionit policor të koduar “Perimetri”, goditën një tjetër rast të veprimtarisë kriminale në fushën e dhënies ndihmë shtetasve të huaj, për kalim të paligjshëm të kufirit, kundrejt fitimit, me qëllim dërgimin e tyre drejt vendeve të BE-së. Si rezultat i të cilit u bë kapja dhe arrestimi në flagrancë i shtetasve:
K. P., 26 vjeç dhe B. B., 24 vjeç, banues në Tiranë, si edhe u shpall në kërkim shtetasi K. Gj., 27 vjeç, banues në Rëshen.
Shtetasit e mësipërm, janë konstatuar nga shërbimet e Komisariatit të Policisë Maliq, në aksin rrugor Maliq-Lozhan, me dy automjete tip “Benz”, me të cilët po transportonin kundrejt fitimit në drejtim të Tiranës, 8 emigrantë të paligjshëm. Gjatë ndjekjes, këta shtetas nuk iu bindën urdhrit të policisë për të ndaluar, por më pas dy prej tyre u kapën e neutralizuan. Materialet i kaluan Prokurorisë të Rrethit Gjyqësor Korçë për veprat penale “Ndihma për kalim të paligjshëm të kufijve, kryer në bashkëpunim” dhe “Mosbindja ndaj urdhrit të punonjësit të policisë së rendit publik”.
