Një ngjarje e rëndë ka ndodhur mëngjesin e sotëm në qytetin e Tiranës. Dyshohet se dhëndri i familjes ka vrarë vjehrrën dhe vjehrrin, më pas, ai është vetëvrarë. Ngjarja e rëndë mësohet se ka ndodhur në zonën e Astirit.
“Sot rreth orës 06:56, në Astir, në rrugën “Kristaq Mone” janë gjetur në banesë të vrarë me armë zjarri shtetasit B. M., 63 vjeç dhe Xh. M., 52 vjeçe. Poshtë ballkonit të banesës së shtetasve B. M., dhe Xh. M., është gjetur i dëmtuar dhëndëri i tyre, shtetasi M. L., i cili është transportuar për ndihmë mjekësore në spital ku dhe ka ndërruar jetë. Po punohet për sqarimin e plotë të rrethanave të ngjarjes”, tha policia në një njoftim paraprak për mediat.
Tvklan.al mëson se dhëndri i ka ekzekutuar vjehrrit me armë, më pas ka goditur veten me thikë dhe është hedhur nga ballkoni. Motivet e kësaj ngjarjeje tragjike nuk dihen ende. /tvklan.al
