Administrata Trump të premten ka njoftuar për taksë shtesë prej 25 për qind ndaj prodhimeve të kozmetikës, çantave të dorës dhe produkteve të tjera që prodhohen në Francë, të cilat e kanë vlerën e 1.3 miliard dollarëve.
Taksat shtesë janë si kundërpërgjigje e Shteteve të Bashkuara ndaj taksës për shërbime dixhitale, të vendosur nga Franca, e cila i prek më së shumti gjigantët teknologjikë amerikanë. Megjithatë, kjo taksat e reja mund të mos hyjnë në fuqi në një periudhe deri në 180 ditë, shkruan “Reuters”.
Zyra e përfaqësuesit amerikan për Tregti tha se shtyrja e afatit për fillimin e zbatimit të taksave do të shërbejë për të ofruar më shumë kohë për zgjidhjen e kësaj çështjeje, përfshirë zhvillimin e diskutimeve në Organizatën për Bashkëpunim dhe Zhvillim Ekonomik. Ky vendim përputhet edhe me vendimin e Francës për të mos e zbatuar menjëherë taksën prej 3 për qind për shërbime dixhitale.
Masa e re nga Shtetet e Bashkuara erdhi pas një hulumtimi se taksa franceze i diskriminon kompanitë teknologjike amerikane, siç janë “Google”, “Facebook”, dhe “Apple Inc”. Franca dhe disa vende të tjera i shohin taksat për shërbime dixhitale si mënyrë për rritjen e të ardhurave nga operacionet lokale të kompanive të mëdha teknologjike, për të cilat thonë se fitojnë shumë nga tregjet lokale, ndonëse kontribuojnë pak në arkat e shteteve.
Bisedimet e mëparshme për gjetjen e një zgjidhjeje shumëpalëshe rreth taksave për shërbime dixhitale kanë dështuar. Negociatat janë ndërlikuar edhe më shumë pas përhapjes së koronavirusit. Muajin e kaluar, sekretari amerikan i Thesarit, Steven Mnuchin, i befasoi shtetet evropiane, kur sugjeroi një ndërprerje të bisedimeve për shkak të mungesit të përparimit në to.
