“Shqipëri e vogël zemër e madhe! Vëllazëri në momentet më të vështira!”. Kështu u shprehën Agostino Miozzo, Kordinator i Komitetit Teknino Shkencor i qeverisë italiane për përballimin e infeksionit COVID, i pranishëm në krye të Mbrojtjes Civile Italiane, gjatë tërmetit të 26 nëntorit në Shqipëri dhe Ambasadorja e Shqipërisë në Itali, Anila Bitri Lani, në pritjen që iu rezervua grupit të çiklistëve nga Conegliano Veneto, në përfundim të turit të solidaritetit me mjekët dhe infermierët shqiptarë.
Grupi i apasionuar i çiklistëve përshkoi rreth 1300 kilometra me etapa të ndryshme simbolike, për të falenderuar mjekët dhe infermierët që shërbyen në spitalin e Brescias gjatë emergjencës së COVID në Itali, për të mbërritur në Romë, ku u pritën në Departamentin e Mbrojtjes Civile Italiane, duke finalizuar etapën e fundit në Ambasadën shqiptare.
Çiklistët nga Rajoni i Venetos, të shoqëruar nga Koordinatori Kombëtar i Komitetit Tekniko Shkencor i qeverisë italiane për përballimin e COVID-19, Agostino Miozzo dhe Kryetari i Bashkisë së Conegliano Veneto, Fabio Chies, përshkuan edhe Sheshin Albania, ku ndodhet monumenti i Heroit Kombëtar Gjergj Kastrioti Skërnderbej.
Etapa në këtë shesh historik të komunitetit shqiptar e arbëresh në kryeqytetin italian, simbolizonte edhe mbërritjen në Sheshin Skënderbej në Tiranë. Plani për mbërritur në Tiranë nga Conegliano Veneto me biçikleta për të falenderuar e takuar mjekët e infermierët dhe Kryeministrin Edi Rama, ishte objektivi dhe dëshira e grupit, që nuk mundi të realizohej kësaj radhe, për arsye të situatës krijuar nga COVID-19.
Gjatë takimit me Ambasadoren Bitri Lani, u dorëzuan çmimet dhe dhuratat simbolike “të Qytetit europian të Verës” për mjekët dhe infermierët shqiptare, me dedikimet e Guveranatorit të Rajonit të Venetos, Luca Zaia dhe ish-trajnerit të Kombëtares Shqiptare, Gianni De Biasi, në lidhje të drejpërdrejtë me disa prej tyre në Tiranë. Gjatë ceremonisë ishte i pranishëm edhe kampioni shqiptar i çiklizmit Eugert Zhupa, pjesëmarrës në katër edicione të garës me fame botërore “Giro d’Italia”.
