Policia e Gjirokastrës ka gjetur ditën e sotme një grua të moshuar, e cila ishte shpallur e zhdukur një ditë më parë. Sipas njoftimit të policisë, kërkimi për të moshuarën ka nisur menjëherë pas denoncimit të familjarëve. 74-vjeçarja me inicialet V. F., u gjet me anë të një droni në pyllin e fshatit Hundkuq. Ndërkohë familjarët e të moshuarës kanë treguar për policinë se 74-vjeçarja vuante nga problemet e shëndetit mendor.
Njoftimi i policisë: Gjirokastër. Largohet nga banesa e moshuara me probleme të shëndetit mendor, gjendet fal kërkimeve me dron nga ana e Policisë. Mesditën e djeshme shtetasja V.F., 74 vjeçe, banuese në Tepelenë, është larguar nga banesa e vajzës së saj në fshatin Hundkuq, Gjirokastër. Të afërmit e shtetases së mësipërme sapo kanë konstatuar mungesën e saj në banesë, kanë kërkuar ndihmën e policisë për ta gjetur.
Shërbimet e Komisariatit të Policisë Gjirokastër, pas njoftimit të marrë për largimin nga banesa të shtetases V.F., kanë nisur kërkimet në terren duke përdorur dronin e Policisë. Ditën e sotme, nëpërmjet dronit është bërë lokalizimi dhe gjetja e shtetases V.F., në pyllin e fshatit Hundkuq. Familjarët e shtetases V.F, kanë falënderuar efektivat e Policisë për angazhimin dhe gjetjen e nënës së tyre.
