Festat e fundvitit po vijnë dhe ndryshe nga vitet e tjera, duket se Viti i Ri 2019 do të vijë pa fishekëzjarre.
Kjo pasi, Ministri i Brendshëm, Ministri i Mbrojtjes dhe Ministria e Financave kanë firmosur këtë të martë një urdhër për ndalimin e hedhjes në treg të lëndëve piroteknike dhe fishekzjarreve, të cilët përbëjnë rrezik të lartë në përdorimin e lirë nga qytetarët.
Në këtë urdhër përcaktohen masat dhe hapat që do të ndërmerren për ndalimin e hedhjes në tregun e brendshëm të kapsollave, shashkave dhe fishekzjarrëve.
Institucionet përkatëse do të ngrenë një Task Forcë, e cila do të ushtrojë kontrolle për verifikimin e kushteve në linjat e prodhimit dhe të magazinimit të subjekteve të licencuara për këto produkte.
Në urdhër përcaktohen edhe rastet kur do të lejohen këto produkte, si festat kombëtare apo lokale të organizuara nga institucionet publike, evente festive, ose në rast festash familjare dhe në të gjitha rastet do të lejohen vetëm pas vënies në dijeni të Komisariatit të Policisë, që mbulon zonën.
