Minatorët e kompanisës Albchrome, në pronësi të biznesmenit Samir Mane në Bulqizë mëngjesin e sotëm kanë bojkotuar masivisht punën dhe kanë dalë në protestë. Kjo protestë e tyre vjen për shkak të shkarkimit nga puna të kryetarit të sindikatës së Minatorëve të Bashkuar të Bulqizës, Elton Debreshi. Ai u shkarkua vetëm pak ditë pas krijimit të kësaj sindikate në të cilën ai u zgjodh kryetar, ndërsa disa prej themeluesve u thirrën nga kompania në Tiranë me arsyetimin “për të shmangur raste të thyerjes së etikës dhe disiplinës në vendin e punës”. Ata e quajnë largimin nga puna të Debreshit si të padrejtë dhe të paligjshëm.
Sindikata e Minatorëve të Bashkuar të Bulqizës u njoh nga gjykata më 15 tetor të këtij viti. Themeluesit e saj thonë se kërkojnë kushte më të mira pune, paga më të mira dhe njohje të vështirësive. Qëllimi i sindikatës është të rrisë nivelin e përfaqësimit të punëtorëve në industrinë minerare. Ata kanë akuzuar sindikatat që kanë përfaqësuar minatorët e Bulqizës deri më sot, se janë bërë palë me firmën dhe interesat e tyre, duke lënë në harresë problemet me të cilat përballen prej vitesh minatorët e Bulqizës.
