Një 34-vjeçar nga Tirana ka rënë ditën e sotme në prangat e policisë, pasi akuzohet për 3 vjedhje në biznese të ndryshme. Policia bën me dije se autori është mundur të identifikohet falë kamerave të sigurisë të dorëzuara nga bizneset. Hajduti duket të ishte i fiksuar pas dyqaneve elektronike, pasi ka vjedhur 3 laptopë në dyqane të ndryshme në kryeqytet
“Efektivet nga Komisariati i Policisë Nr. 1 ne operacionin e koduar “Lenovo”, arrestuan një 34-vjeçar, si autor i dyshuar i tri rasteve të vjedhjes së pajisjeve elektronike në dyqane të ndryshme të kryeqytetit.
Në pranga ra shtetasi E. C., 34 vjeç, banues në Tiranë.
Bazuar në provat e grumbulluara, informacionet e mara në rrugë operative dhe veprimeve hetimore të kryera, specialistët për parandalimin dhe hetimin e krimit bënë të mundur zbardhjen dhe dokumentimin me prova ligjore të tri rasteve të vjedhjes së pajisjeve elektronike (laptop) nga ky shtetas, në dyqane të ndryshme të kryeqytetit, konkretisht:
- Më datë 30.12.2019 ka vjedhur një laptop, në dyqanin e një qendre tregtare;
- Më datë 10.01.2020 ka vjedhur një laptop, në një dyqan në rrugën “Luigj Gurakuqi“;
- Më datë 13.01.2020 ka vjedhur një laptop, në një dyqan në Rrugën e Durrësit;
Materialet procedurale i kaluan për veprime të mëtejshme Prokurorisë të Rrethit Gjyqësor Tiranë, për veprën penale “Vjedhja””, thuhet në njoftimin e policisë.
