“The Guardian” ka publikuar pamjet e shpërthimit të vullkanit Krakatau që shkaktoi cunamin vdekjeprurës në Indonezi.
Një shpërthim i vullkanit një ditë para cunamit u filmua nga kamerat e një ekipi të Agjencisë së Ruajtjes së Burimeve Natyrore në Indonezi. Krakatau ndodhet në ngushticën midis Java dhe Sumatra, që lidhin Oqeanin Indian dhe Detin Java. Autoritetet thanë se cunami i së dielës në Indonezi ishte shkaktuar nga rëshqitjet e dherave në det të shkaktuara nga shpërthimi i vullkanit, dhe jo nga ndonjë tërmet.
Deri më tani numri i viktimave ka shkuar në të paktën 281 persona, ndërsa të plagosurit numërohen të jenë mbi 1 mijë. Dallgët e larta të Oqeanit Indian vërshuan në brigjet indoneziane duke shkatërruar ndërtesa e automjete. Indonezia goditet shpesh nga tragjedi të tilla, pasi ndodhet në të ashtuquajturën Unaza e Zjarrin, ku janë të shpeshta vullkanet, tërmetet e cunamët.
