Është bërë i ditur identiteti i burrit që u përball me një nga autorët e sulmit të armatosur në Sidnei, duke e çarmatosur atë. Bëhet fjalë për Ahmed al Ahmed, 43 vjeç, pronar i një dyqani frutash në zonën Sutherland dhe baba i dy fëmijëve.
Sipas mediave australiane, al Ahmed u qëllua dy herë gjatë përpjekjes për të neutralizuar sulmuesin dhe aktualisht ndodhet i shtruar në spital. Një i afërm i tij, Mustafa, i cili foli për 7News, tha se gjendja e tij shëndetësore po monitorohet nga mjekët. “Ai është në spital dhe nuk e dimë ende saktësisht se çfarë po ndodh brenda”, u shpreh ai.
Mustafa shtoi se kushëriri i tij mund të ketë shpëtuar jetë të shumta duke u përballur drejtpërdrejt me sulmuesin.
Nga të shtënat masive në plazhin Bondi, sipas bilancit paraprak, kanë humbur jetën të paktën 11 persona, ndërsa 29 të tjerë janë plagosur. Autoritetet australiane po hetojnë ngjarjen, e cila është cilësuar si sulm terrorist. Mediat raportojnë se objektiv i dyshuar i sulmit ishte një aktivitet hebraik i lidhur me festën e Hanukkah-s, festivali i dritave.
