Përfaqësuesi i Lartë i Bashkimit për Punët e Jashtme dhe Politikën e Sigurisë Josep Borrell vizitoi Ballkanin Perëndimor këtë javë në një kohë që Ukraina ndodhet nën sulmin ushtarak të Rusisë.
“Fillimi i bisedimeve të anëtarësimit me Maqedoninë e Veriut dhe Shqipërinë është një prioritet i lartë për BE-në”, theksoi Borrell gjatë vizitës në të dy vendet.
Ai udhëtoi gjithashtu në Bosnje dhe Hercegovinë, ku u kërkoi udhëheqësve t’i jepnin fund bllokimit të krizës politike dhe përparimit në reformën zgjedhore.
Gjatë takimit me kryeministrin e Maqedonisë së Veriut Dimirar Kovaçevski të hënën, Borrell përshëndeti shtysën e re mes Sofjes dhe Shkupit për arritjen e një zgjidhjeje të pranueshme reciprokisht.
“Është koha për të zgjidhur çështjet e kahershme dypalëshe dhe për të filluar sa më shpejt negociatat e anëtarësimit në BE”, tha ai.
Të martën, gjatë takimit me kryeministrin Edi Rama, Përfaqësuesi i Lartë theksoi marrëdhëniet e forta BE-Shqipëri dhe përshëndeti angazhimin ndërkombëtar të vendit tonë për ruajtjen e sigurisë.
Ai theksoi se është koha për të “rigjallëruar” procesin e zgjerimit dhe për të integruar Shqipërinë dhe të gjithë Ballkanin Perëndimor në mënyrë të pakthyeshme në Bashkimin Evropian.
“Shqipëria përmbushi të gjitha kushtet për hapjen e negociatave të anëtarësimit dhe unë mbështes fuqishëm, punoj, angazhohem dhe kontribuoj në fillimin e bisedimeve të anëtarësimit gjatë Presidencës Franceze”, tha Borrell.
