Arta Vorpsi është e vetmja që ka paraqitur kandidaturën për anëtare në Gjykatën Kushtetuese. Ditën e djeshme, Kuvendi hapi procedurën e aplikimeve për vendin vakant në Gjykatën Kushtetuese. Kujtojmë se vitin e kaluar ka pasur përplasje të forta mes Presidentit Meta dhe kreut të KED, Ardian Dvorani për Arta Vorpsin. Pati diskutime pasi Arta Vorpsi dhe Marsida Xhaferllari, u emëruan për të njëjtin vend në Gjykatën Kushtetuese.
Më pas, Gjykata Kushtetuese konfirmoi se Marsida Xhaferllari ka të drejtën të ushtrojë funksionin e anëtares së Gjykatës Kushtetuese, duke përjashtuar si anëtare Arta Vorpsin e cila u betua tek noterja. Kujtojmë se Kuvendi shpalli hapjen e procedurës së aplikimit për vendin vakant për një anëtar të Gjykatës Kushtetuese, me qëllim plotësimin e “vakancës së parakohshme” të krijuar për shkak të mbarimit para afatit ligjor të mandatit të z. Fatos Lulo duke zbuluar kriteret që duhet të plotësojë kandidati:
-të ketë zotësi të plotë për të vepruar; -të ketë mbaruar arsimin e lartë juridik, Diplomë e Nivelit të Dytë; -të mos ketë ushtruar funksione politike në administratën publike dhe të mos ketë mbajtur pozicione drejtuese në parti politike gjatë 10 viteve të fundit nga data e kandidimit; -të mos jetë në procedim penal dhe të mos jetë dënuar me burgim për kryerjen e një vepre penale;-të mos jetë larguar nga detyra për shkaqe disiplinore dhe të mos ketë masë disiplinore në fuqi; -të ketë kaluar me sukses procesin e kontollit dhe verifikimit të pasurisë së tij personale dhe të familjarëve të tij, sipas ligjit. Plotësimi kritereve vlerësohet në bazë: vjetërsisë në profesion; -përvojës së veçantë të kandidatit në një fushë të caktuar të së drejtës, ose këshilltar ligjor i Gjykatës Kushtetuese a Gjykatës së Lartë;-kualifikimeve pasuniversitare dhe trajnimeve në fushën e të drejtës kushtetuese, të drejtave të njeriut ose në një fushë tjetër të së drejtës; -treguesve shkencorë, ku përfshihen botimet dhe artikujt shkencorë në fushën juridike; -ecurisë gjatë kryerjes së arsimit të lartë juridik, me një mesatare notash jo më pak se 8 ose të barasvlershme me të, nëse arsimi i lartë është përfunduar jashtë vendit ose vlerësimit përfundimtar në Shkollën e Magjistraturës; -informacioneve të marra nga institucione të tjera publike.
