Gjatë orëve të mbrëmjes së djeshme, në Bruksel, përfaqësuesja e lartë e BE-së, Federica Mogherini, është takuar me liderët e vendeve të Ballkanit, ndërsa ka munguar Kryeministri i Shqipërisë, Edi Rama.
Në bazë të video-pamjeve të publikuara nga presidenca malazeze gjatë takimit, shihet se liderët takojnë njëri-tjetrin duke u përshëndetur me shtrëngime duarsh.
Në këtë rast, presidenti Hashim Thaçi i shtrëngon dorën edhe kryetarit të Republikës Serbe të Bosnjës, Millorad Dodik, të cilin më parë e kishte injoruar.Në një moment, teksa Mogherini përshëndet të pranishmit, kur i afrohet Thaçit, e përqafon dhe e puth në faqe, ndërsa dëgjohet Presidenti i Serbisë, Aleksandar Vuçiç të thotë: “Hashim, Federica më së shumti ka dëshirë të puthet me ty”, kurse Thaçi nuk dëgjohet ta komentojë atë në këtë rast, por Vuçiç vazhdon: “Shikoni se si bëhet sikur nuk merr vesh serbisht, por di shumë mirë”.
