Bota e Futbollit amerikan u trazua disi këtë fundjavë me përfshirjen e një prej yjeve të NFL, në listën e të prekurve me koronavirus. Pandemia që ka tronditur globin, nuk kurseu as Von Miller, pasuesin më të mirë të kampionatit dhe një lojtar që ka spikatur në dekadën e fundit në ndeshjet më të rëndësishme, me fanelën e Denver Bronkos.
Von Miller preferoi të japë vetë lajmin e prekjes me Covid 19 duke i bërë apel tifozëve të respektojnë rregullat pasi virusi nuk bën dallime moshe dhe statusi, dhe është kërcënim për të gjithë. “Pass rusher” më i mirë i kampionatit është në izolim në shtëpinë e tij nën kontrollin e mjekëve dhe pa simptoma të rënda. Von Miller është 31 vjec dhe është seleksionuar plot 8 herë mes më të mirëve në NFL. Ai bëhet futbollisti i dytë i Ligës që preket nga koronavirusi pas rastit pozitiv të mëparshëm të Brajan Alen që militon me Skuadrën e Los Anxheles Rems.
