Parisi është një nga ata klube, që mundohen t’i respektojnë deri në fund kontratat me futbollistët e tyre. Megjithatë, mbetet të shohim nëse do të ndodhë kështu me Edinson Kavanin. Uruguaianit i skadon kontrata në fund të këtij sezoni, por ai dëshiron të largohet që këtë muaj, pasi ka arritur marrëveshjen personale me Atletikon e Madridit. Ardhja e Mauro Ikardit e ka kthyer në rezervë 32-vjeçarin dhe nëse qëndron nuk do të kishte minuta të shumta në këmbë. Ndryshe do të ndodhte te Atletiko, me Simeonen që po dështon të gjejë një sulmues me marrëdhënie të rregullt me golin. Kështu, Kavani i ka kërkuar klubit të largohet që këtë merkato, lajm që konfirmohet edhe nga drejtori sportiv i PSG, Leonardo.
“Ne gjithmonë kemi të njëjtin vlerësim për Kavanin. Shpresojmë që ai të qëndrojë me ne. Ditën e sotme ai na kërkoi të linte klubin. Në po e studiojmë situatën. Kurrë nuk kemi menduar ta shesim atë, por ai ka bërë një propozim për t’u larguar. Do të shohim në ditët në vazhdim dhe po e arsyetojmë situatën sepse e respektojmë lojtarin”, u shpreh Leonardo.
