Presidenti i Republikës, Ilir Meta ka zhvilluar ditën e sotme me kërkesë të tyre, një takim me përfaqësues të Shoqatës “Durrësi Autokton”.
Në këtë bashkëbisedim, Meta është njohur me përpjekjet e kësaj shoqate për të ndalur shkatërrimin urban dhe zhdukjen e vlerave të trashëgimisë historike, arkeologjike dhe kulturore të qytetit bregdetar. Ndërkaq, në fjalën e tij Kreu i Shtetit është shprehur se të zgjedhurit për të udhëhequr vendin duhet të kenë frikë nga populli teksa referendumi i 25 prillit do të jetë referendumi i cili do të vendosë shenjtërinë e votës dhe lirinë e saj.
“Mirëqeverisja është e bazuar vetëm mbi llogaridhënie, që do të thotë se të zgjedhurit, që nga Presidenti e të gjithë me radhë, duhet të kenë frikë nga qytetarët! Jo qytetarët të kenë frikë nga ata që zgjidhen për t’ju shërbyer dhe për të dhënë llogari. Meqenëse jemi në prag të zgjedhjeve historike të 25 prillit, çdo gjë fillon nga çkapja e votës, nga vota e lirë dhe shenjtërimi i saj.
Ndaj është momenti, që 25 prilli të jetë një ditë referendumi për të vendosur shenjtërinë e votës në këtë vend, në mënyrë, që si vota e Presidentit, si e qytetarit më të thjeshtë të jetë përfundimisht e barabartë! Më 25 prill kemi një mundësi historike të rivendosim në funksion rendin kushtetues, shtetin e së drejtës dhe njëkohësisht të garantojmë fuqinë e qytetarit mbi pushtetin, mbi të zgjedhurin dhe t’i kthejmë këta në shërbim të tyre!
Më 25 prill populli vendos shenjtërinë e votës dhe Kushtetutës së Republikës së Shqipërisë për 100 vitet që do vijnë. Në Kushtetutë thuhet qartë: “Sovraniteti i përket popullit në Republikën e Shqipërisë. Sovrani flet përmes votës së lirë.”– tha Meta./Opinion.al
