Astrit Patozi dhe Jozefina Topalli do të bashkojnë forcat në zgjedhjet parlamentare të 25 prillit. Drejtuesi i partisë Bindja Demokratike, ka deklaruar për Fax News se po diskuton që të futet në zgjedhje bashkë me partinë “Lëvizja për Ndryshim”, që drejtohet nga Jozefina Topalli.
Gjatë fjalës së tij Patozi tha se me Topallin është në komunikim të vazhdueshëm dhe shumë shpejt do të kenë një qëndrim të përbashkët për sa i përket edhe interpretimit të kauzës së përbashkët, por edhe të një liste ku të jenë përfaqësues të disa forcave politike.
“Bindja Demokratike po bën aq sa mundet në një kohë të vështirë pandemie por edhe në një kohë depresioni politik që po përjeton Shqipëria. Në po përpiqemi që të shfrytëzojmë të gjitha kapacitete tona në dy fronte.
E para për të gjetur njerëzit më të denjë që do të garojnë në listën e 25 prillit si përfaqësues të Bindjes Demokratike dhe nga ana tjetër duke qenë në komunikim me aleatët potencialë të cilët mund të na bashkohen në një listë përbashkët, e cila sipas nesh ka për detyrim që të përfaqësojë polin e tretë në Shqipëri në ndryshim me dy blloqet e tjera politike, me qeverinë e Ramës në pushtet dhe me opozitën e Lulzim Bashës dhe të Monika Kryemadhit të cilët sipas nesh janë të kompromentuar.
Me Topallin jemi në komunikim të vazhdueshëm dhe shumë shpejt do të kemi një qëndrim të përbashkët për sa i përket edhe interpretimit të kauzës së përbashkët që kemi por edhe të një liste ku të jenë përfaqësues të disa forcave politike dhe shumë shpejt do të keni lajmin për këtë çështje. Janë pjesë e komunikimit tonë dhe komunikojmë me gjithkënd që mendon se Shqipëria ka nevojë për një alternativë të re të ndryshme nga dy blloqet e vjetra politike.“- tha Patozi. (M.Q/Faxweb.al)
