Në ditën e dytë të vizitës së komisionit të Ekonomisë dhe Financave në qarkun e Vlorës me mbështetjen e OSBE-së u zhvillua një takim informues dhe monitorues në Portin dhe Doganën e Vlorës. Anëtarët e komisionit dhe drejtuesit e dy agjencive, Kosta Vjerro dhe Admir Malaj diskutuan për problematikat e punës në port dhe doganë shkaktuar nga COVID.
Diskutimi u përqëndrua te rishikimi i buxhetit dhe situata e të ardhurave në kushtet e pandemisë, zhvillimi i qëndrueshëm ekonomik i Portit të Vlorës, rritja e investimeve për përpunimin e mallrave në kalatat e portit, rritja e eficensës së terminalit të lëvizjes së udhëtarëve etj.
Komisioni i Ekonomisë dhe Financave e zhvilloi takimin, në terminalin e ri të pasagjerëve, ndërtuar nga autoriteti portual në vitin 2019. Ky investim i ka dhënë mundësi portit të Vlorës të konkuroj denjësisht me porte të ngjashme në vende fqinje si Italia dhe Greqia.
