Gjiganti kinez i telekomunikacionit “Huawei”, i renditur në listën e zezë nga SHBA për arsye sigurie, parashikon një përshkallëzim të sanksioneve amerikane në vitin 2020, por mbetet i sigurt për mbijetesën e tij, tha sot themeluesi i tij, Ren Zhengfei.
“Këtë vit, SHBA mund të intensifikojë fushatën e saj kundër “Huawei”-t, por nuk mendoj se ndikimi në aktivitetet tona do të jetë shumë i rëndësishëm. Për vitin 2020, ne jemi më të sigurt për mbijetesën tonë, madje edhe përballë sulmeve të reja”, tha Zhengfei, para krerëve të mëdhenj dhe udhëheqësve politikë, të mbledhur në Forumin Ekonomik Botëror (WEF) në Davos.
Numri dy në botën e telefonave inteligjentë dhe kampion i pajisjeve të rrjetit 5G, “Huawei” është në qendër të debateve të ashpra mes Pekinit dhe Uashingtonit, i cili ka frikë se pajisjet e tij do të përdoren për spiunazh, akuza të cilat janë kundërshtuar fuqimisht nga grupi.
