Mëngjesin e sotëm Monika Kryemadhi, gjatë një bashkëbisedimi me gazetarët, hodhi akuza të rënda mbi Bashkinë e Tiranës, duke paraqitur kartelën e hipotekës së shkollës Sami Frashëri nën pretendimet se pronësia e truallit të institucionit arsimor ishte kaluar në emër të disa personave.
Në lidhje me këtë akuzë ka reaguar dhe kryebashkiaku Erion Veliaj, i cili shprehet se dilema është nëse kryetarja e LSI-së duhet çuar për mjekim apo për shpifje në Gjykatë. Për të rrëzuar akuzat e Kryemadhit Veliaj, ka publikuar dokumentet nga Kadastra, ku sipas tij vërtetohet se pronësia e shkollës “Sami Frashëri” është e Bashkisë së Tiranës
“Dilema është, duhet çuar për shpifje apo për mjekim? Ja prona e “Sami Frashërit, boll u bëtë gazi i botës! Pastaj hani inat me popullin që s’ju voton! Si te lodrat, pazari, sheshi, kalaja – njësoj Samiu – do fshiheni nga turpi. Po ju dhe turpin e hani me bukë”, shkruan Veliaj.
