Ditën e djeshme, Australia shpalli gjendjen e jashtëzakonshme, pasi zjarret rrezikojnë sërish qytetet kryesore. Mediat ndërkombëtare bëjnë me dije se vatrat e reja të zjarrit janë shfaqur në afërsi të kryeqytetit australian Canberra. Deri tani raportohet se janë djegur 35 mijë hektarë pyje të tjera.
Autoritetet vendase e kanë pasur të pamundur të evakuojnë banorët rreth kryeqytetit dhe për këtë arsye iu kanë kërkuar që ata të strehohen në zona të sigurta, shkruan BBC.
Situata nuk pritet të përmirësohet, meteorologët paralajmërojnë mot të nxehtë dhe erë gjatë fundjavës, çka shton ndjeshëm rrezikun e zgjerimit të hartës së zjarreve.
Deri tani që prej shtatorit nga zjarret kanë humbur jetën të paktën 33 person dhe janë shkatërruar mijëra shtëpi. Gjithashtu, dëme të mëdha ka pasur edhe në kafshë, pasi deri tani raportohet se mbi 1 bilion kafshë kanë ngordhur për shkak të shkak të zjarreve.
“Problemi që e kemi me zjarret është se ato vetë po i përcaktojnë kushtet e motit dhe bashkë me erën po forcohet intensiteti i flakëve”, tha komisionerja e shërbimeve emergjente, Georgeina Whelan. Autoritetet raportojnë se në vend janë rreth 60 vatra aktive zjarri, mbi të cilat po punohet të kontrollohen.
