Ministri i Brendshëm, Taulant Balla ka vizitua shkollën e mesme “Petro Nini Luarasi” në Tiranë, e duke bashkëbiseduar me nxënësit e kësaj shkolle, u shpreh se prej shtatorit, siguria në shkolla po ngrihet në një nivel tjetër.
Sa i përket luftës ndaj fenomeneve negative që kërcënojnë të rinjtë, ministri tha se është e nevojshme krijimi i një aleance me nxënës e mësues.
“Shkolla juaj është në qendër të Tiranës, dhe ka lidhje me zona shumë të frekuentuara, që janë edhe shpesh burim i fenomeneve që shqetësojnë prindërit tuaj. Detyra jonë është të garantojmë që qoftë te rruga kur vini, qoftë lokalet që frekuentoni apo mjedise të tjera publike, do të rrisim kontrollin. Që ne ta bëjmë punën më mirë, na duhet dhe një aleancë dhe bashkëpunimi juaj. Ju përmes oficerit të sigurisë, mësuesve, etj mund të ndani me ne të dhëna për ta çuar në një nivel tjetër paketën e sigurisë, që ne kemi iniciuar. Çdo informacion që na jepni është tepër i dobishëm”, u shpreh ministri.
Të gjitha institucionet qendrore e vendore do të jenë të angazhuara për të bërë detyrën.
“Lufta kundër shpërndarësve të narkotikëve mund të fitohet nëse kemi më shumë informacion. Raste të personave që ju thonë shko merre këtu, shko blije atje, të na i thoni dhe pastaj është policia që merr masa për të identifikuar dhe vendosur ligjin. Kam marrë mesazhe nga nxënës e prindër dhe policia ka vepruar duke ndërhyrë në kohë”, tha ministri Balla.
