Vdekja e 16-vjeçarit shqiptar në Greqi, mbyllen pa afat fushat e futbollit në Kavala
Vdekja tragjike e 16-vjeçarit shqiptar Asllan Gjana në ishullin e Thasos ka detyruar autoritetet greke të marrin masa urgjente për sigurinë në ambientet sportive.
Bashkia e Kavalës ka vendosur mbylljen pa afat të fushave të futbollit nën administrimin e saj, si dhe pezullimin e stërvitjeve dhe kurseve të futbollit për fëmijët, deri në përfundimin e kontrolleve të sigurisë.
I riu humbi jetën gjatë një ndeshjeje, pasi u përplas me kokë në një mur pranë tribunave, teksa po ndiqte topin jashtë vijave të lojës.
Kontrollet do të përqendrohen te përmasat e fushave dhe distancat ndërmjet vijave të lojës dhe mureve apo pengesave të tjera të palëvizshme.
Në rast se konstatohen mangësi, aktivitetet sportive do të lejohen vetëm pas plotësimit të standardeve të sigurisë dhe marrjes së miratimeve përkatëse.
