Ministrja e re e Infrastrukturës, Energjisë dhe Transporteve, Belinda Balluku ka ndërprerë koncesionin për ndërtimin e aksit rrugor Thumanë-Kashar.
Në deklaratën e saj të parë për mediat, ministrja Balluku bëri me dije se ky partneritet u ndërpre për shkak të Paktit për Universitetin.
Sikurse tha ajo, fondet e planifikuar për këtë rrugë do të përdoren për Universitetin, në kuadër të vendimeve të reja që u morën pas protestës së studentëve.
“Ky është komunikimi im i parë zyrtar. Uroj që të kemi një bashkëpunim të shkëlqyer. Kam vendosur të bëj ndërprejen e Partneritetit Publik-Privat të aksit Kashar -Thumanë. Buxhetin e saj do t’ia dedikojmë Paktit për Universitetit. Për ne ky aks vazhdon të jetë i rëndësishëm”, u shpreh ajo.
Ministrja tha se qeveria nuk do të heqë dorë nga ndërtimi i këtij aksi
“Natyrisht, ne nuk do të heqim dorë nga ndërtimi i këtij aksi, aq më tepër që projekti është gati”
Thumanë-Fushë Krujë-Vorë-Kashar u vendos të ndërtohej në korrik të 2018-s nga kompania “Gener 2”, e cila ofroi për ndërtim dhe mirëmbajtje gjithsej 225.821.553 euro, nga 245 milionë euro që ishte fondi limit i vendosur nga qeveria në nisje të procedurës së prokurimit.
Ndërtimi i këtij aksi është shoqëruar vazhdimisht me akuza për shkak të kostove të tij.
