SPAL fiton 2-1 ndaj Torinos. Nëse SPAL do të arrijë të mbijetojë në Serinë A, një meritë të madhe për këtë do ta ketë padyshim edhe Etrit Berisha. Portieri i përfaqësueses shqiptare po dhuron pritje pas pritje në çdo ndeshje për të ndihmuar klubin e vogël të qytetit të Ferrarës që të marrë pikë dhe sot, pas tre humbjesh radhazi ka ardhur edhe fitorja që e largon për momentin nga vendi i fundit në klasifikim. Ndaj Torinos, në transfertë, gjithçka nisi keq për skuadrën e Berishës pasi vendasit shënuan që në minutën e 4-t me anë të Rinkon. Më pas, portierit shqiptar iu desh të bënte disa pritje mbresëlënëse radhazi ndaj Berenguer, Beloti e N’kulu, të cilët nuk arritën ta kalonin më, duke dhënë sinjale shprese për ekipin e tij që gjeti barazimin me Strefeza para fundit të pjesës së parë.
Në të dytën, Torino nuk u shfaq edhe aq i rrezikshëm, ndërsa SPAL përfitoi nga dalja me të kuq e Bremer të vendasve. Kur mbeteshin më pak se 10 minuta nga fundi, me anë të Petanja gjeti golin e fitores 2-1 që e ngjit në vendin e parafundit në klasifikim dhe në këtë fundviti i jep një shpresë më shumë për mbijetesën.
