Gazetarja Beti Njuma, përveç gazetarisë përmes publikimeve në rrjetet sociale, ka zbuluar se ka dhe një pasion të dytë, që është ngjitja në male. Këtë na e ka treguar vazhimisht përmes postimeve në Instagramin e saj.
Por, ndryshe nga herët e tjera ku tregon se ka arritur në majën e një mali, këtë herë publikoi një foto nga shtrati me këmbën në allçi. Ajo shkruan se ka pasur një frakturë të vogël gjatë ngjitjes në malin e Çikës dhe duhet ta mbajë këmbën të fashuar në allçi për 6 javë “Gjithçka po shkonte bukuri, ç’e do, zoti qenka pak huqli, se kur s’e pret, të bëka ca ndryshime
dhe…iku, vajti fitorja ime.” Kush e ka lexuar “Lufta për fronin” dramën historike të Ibsenit s’mund të mos i mbajë mend këto fjalë profetike të Peshkop Nikolasit të cilat se ç’më shkuakan për shtat nga ky shtrat. Ata që i bien shkurt më thanë syri i keq, por kush e ka paksa haberin nga mali e di se është çështje e humbjes së përqëndrimit, një dehje nga “fitorja” e metrave të fundit pas një lodhjeje sfilitëse.
Çika është një majë e gjatë rreth 9 orë, me gjithë pushimet dhe ndalesat, e lodhshme me 1600 metra disnivel dhe me shume ngjitje-zbritje. Pikërisht në 100 metrat e finishit pa dalë në rrugën e asfaltuar të Llogarasë një pakujdesi shkon e të merr në qafë. Një frakturë e vogël të bën hatanë e madhe që të shtrëngon të fashohesh 6 javë në allçi në pikë të beharit hem pa mal e hem pa det. Por është vetëm një mirupafshim e përkohshme.
Falemnderit Dëfrimit që më mbajti kalaqafë për një copë rrugë gjersa dolëm në xhade, Fredit që më çoi në spital e më mbështeti moralisht, mjekëve të ushtarakut për mjekimin, dr Gjergjit e prof Llukës për këshillat dhe orientimin dhe të gjithë atyre që u merakosën për mua!
Taksirat! Qejfi i ka dhe ca kusure”, shkruan ajo.
