Edhe kjo e shtunë i ka gjetur dhjetra qytetarë të Durrësit përpara sheshit të Prefekturës, ku po aplikojnë për grantet e tërmetit, ku kërkojnë rindërtimin e banesave të tyre.
Shkak për këtë grumbullim është afati i shkurtër që kanë në dispozicion qytetarët për të bërë aplikimet, ku thirrja u bë vetëm pas ditës së të enjtes. Ministria e Rindërtimit ka rihapur procesin e aplikimeve për familjet e dëmtuara nga tërmeti, që nuk kanë arritur ende të përfitojnë bonusin. Kjo është mundësia e tretë që i jepet qytetarëve të Durrësit për tu dëmshpërblyer. Nga ky proces përfitojnë familjet që kanë dëme të shkallës DS1,DS2 dhe DS3.
Edhe pse e dinë që rrezikojnë shëndetin e tyre si pasojë e grumbullimeve, qytetarët shprehen se e kanë të domosdoshme qëë të qendrojnë në radhë, për shkak të dëmtimeve të banesave, që kërkojnë zgjidhje sa më parë të jetë e mundur.
Një pjesë e qytetarëve shprehen për Fax News, se kanë qenë edhe dje në radhë, por nuk iu është thirrur emri që të dorëzojnë dokumentet. Edhe pse nuk lejohet grumbullimi i më shumë se 10 personave, kjo duket se nuk vlen për institucionet shtetërore, e konkretisht Ministrinë e Rindërtimit.