Gianni De Biasi ka folur për një intervistë në mediat italiane ku ka treguar refuzimet që ai ka bërë dhe ofertat që ka “hedhur poshtë” pasi i kanë kërkuar që të marri rolin e numrit një të pankinës. Për ish-teknikun e Kombëtares Shqiptare, i cili është quajtur edhe hero sepse arriti që të çonte për herë të parë Shqipërinë në finalet e një kompeticioni madhor, siç ishte “Euro 2016” në Francë, interesohen më shumë ekipe që synojnë mbijetesën. Ndër to është edhe ekipi i Palermos, ku vetë tekniku italian ka qenë futbollist për 3 vite në karrierën e tij. Ai është kontaktuar nga Maurizio Zamparini që i kërkonte për të marrë drejtimin e ekipit të Palermos, jo një herë, por plot tre herë.
Për “Corriere dello Sport”, tekniku italian ka thënë: “Më tha se do të ishte sjellje e edukuar nëse do të përgjigjesha menjëherë, por isha për drekë në një shpellë. Nuk e telefonova menjëherë pasi më është dashur një natë që ta mendoja. Mëngjesin e nesërm, i komunikova që nuk ma ndjente. Mbeteshin edhe 4 ndeshje për t’u luajtur dhe nuk mund ta ndihmoja, përndryshe do të shkoja me vrap atje.”- rrëfen De Biasi.
