Komisioni i Disiplinës në Federatën Shqiptare të Futbollit ka publikuar vendimet e marra për shkeljet dhe parregullsitë e konstatuara në javën e parë të Kategorisë Superiore në futbollin shqiptar.
Organi më i lartë i drejtësisë në FSHF ka dënuar me dy ndeshje lojtarin e Partizanit, Solomon Theophilus dhe atë të Kukësit, Bruno Lulaj. Shkak është bërë ajo ndërhyrje e gabuar në ndeshjen hapëse të edicionit të 81-të të Superligës.
Ndërkohë, për sjellje të gabuar të tifozëve, Disiplina ka gjobitur me pesëdhjetëmijë lekë Tiranën.
Vendimet e plota:
“1. Lojtari i FK “Partizani”, Solomon Theophilus, për lojë të rëndë ndaj kundërshtarit, në bazë të Nenit 47/1/b të KDS, dënohet me 2 (dy) ndeshje pezullim nga aktivitetet.
2. Lojtari i KF “Kukësi”, Bruno Lulaj, për lojë të rëndë ndaj kundërshtarit, në bazë të Nenit 47/1/b të KDS, dënohet me 2 (dy) ndeshje pezullim nga aktivitetet.
3. KF “Tirana”, për sjellje të gabuar të spektatorëve, duke hedhur sende në terrenin sportiv, në bazë të Nenit 65/3/c dhe Nenit 65/4/a të KDS, dënohet me gjobë në masën 50.000 (pesëdhjetëmijë) lek.
Kundër vendimit lejohet ankim brenda 3 (tre) ditëve përpara Komisionit të Apelit.”
