Në Ditën Botërore të luftës kundër Diabetit, Presidenti Ilir Meta ka kërkuar paketa të ndihmës ekonomike për të ndalur përkeqësimin e shëndetit të kësaj kategorie në Shqipëri.
Kreu i shtetit theksoi se në Shqipëri 75 mijë qytetarë vuajnë nga diabeti i tipit 2 dhe 1, dhe shumë prej tyre e kanë të pamundur përballimin e kostove të mjekimit, e cila është një barrë e shtuar me situatën e pandemisë ku ndodhet vendi. “Sot, Dita Botërore e luftës kundër Diabetit, e gjen Shqipërinë me rreth 75 mijë qytetarë, të cilët vuajnë nga diabeti i tipit 2 dhe tipit 1. Ndërkohë që konstatohet edhe një rritje e numrit të fëmijëve të prekur prej saj. Një nga kërkesat e drejta, por të pazgjidhura ende, është ribursimi për kategoritë më në nevojë, që për shkak të kushteve të vështira ekonomike e kanë të pamundur përballimin e kostove të larta të mjekimit”, deklaroi Meta.
“Në situatën e pandemisë COVID-19, situata në të cilën ata ndodhen duhet parë me përparësi absolute, nëpërmjet paketave konkrete të ndihmës ekonomike, të dedikuara në parandalimin e përkeqësimit të mëtejshëm të shëndetit të tyre. Të prekurit nga diabeti, në mjerim dhe varfëri, të mbështeten dhe të mos braktisen nga shteti”, shtoi Presidenti.
