Vaksinimi antiCOVID për personelin shëndetësor të vijës së parë të luftës kundër COVID-19, vijon në “Air Albania” që prej datës 11 janar. Në ditën e 13 të vaksinimit anti-COVID, ministrja e Shëndetësisë dhe e Mbrojtjes Sociale, Ogerta Manastirliu, ka publikuar dëshmitë e disa mjekëve që bën vaksinën anti-COVID. “’Drita e shumëpritur në fund të tunelit’ – dëshmitë e mjekëve të vijës së parë të betejës me COVID19 pasi kanë kryer vaksinën anti-Covid në Qendrën e Vaksinimit në Stadiumin Air Albania”, shprehet Manastirliu.
“Unë vij nga Qendra Spitalore Universitare, Shërbimi i Laboratorit të Mikrobiologjisë. Tani sa bëra vaksinën, ndihem shumë mirë”, shprehet njëra prej mjekeve. Një tjetër thotë se “vetë personalisht e prita me shumë dëshirë. Ndoshta hyj te ajo pjesa që them: Pata privilegjin ta bëj vaksinën”.
Andi Koraqi, anëtar i Komitetit Teknik të Ekspertëve deklaron se “kemi thënë që nuk shohim dritë në fund të tunelit për faktin se nuk kishte asnjë medikament. Tani që doli vaksina është drita e shumë pritur, që ne prisnim që të na vinte”.
Një tjetër mjek shprehet se ishte shumë e nevojshme, “sidomos ne që kemi kontakt të përditshëm, na mbron dhe ne dhe familjarët tanë”. “Jam i lumtur dhe i çliruar që kam një mbrojtje tani”, shprehet një tjetër mjek i cili sapo ka marrë dozën e parë të vaksinës antiCOVID.
Pas punonjësve shëndetësor, në radhë për t’u vaksinuar janë personat qe jetojnë në shtëpitë e të moshuarve, më pas personat mbi 90 vjeç, duke vijuar me ata mbi 80 e 70 vjeç e deri tek ata mbi 65 vjeç, pavarësisht sëmundjeve bashkëshoqëruese.
Më herët, Manastirliu ka bërë me dije edhe skenarët për vaksinimin e popullatës.
“Ne kemi vendosur përmes planit të vaksinimit të nisim me mjekët, më pas me të moshuarit në qendrat sociale dhe me të moshuarit mbi 75 vjeç. Ne kemi 3 skenarë. Në skenarin më ambicioz që ne kemi realizuar, është vaksinimi i popullatës në 14 muaj. Skenari i dytë është 18 muaj dhe skenari i tretë është 24 muaj”, ka deklaruar ministrja.
