Në orët e fundit të këtij viti, më shumë se sa ndrydhjen e jetës, dua të kujtoj përpjekjen e të gjithë qytetarëve të Vlorës, në muajt e parë të vitit 2020, për t’iu qenë pranë familjeve të prekura nga tërmeti në Durrës dhe në muajt në vazhdim, duke luftuar me pandeminë që gjunjëzoi botën.
Dua ta kujtoj këtë për të veçuar qëndresën, zemrën e madhe për të ndihmuar, karakterin e fortë. Vetëm duke ushqyer të mirat do të zhvillojmë veten, punën që bëjmë përditë. Asgjë nga këto që na ndodhën nuk harrohet, por nëse në fund të një viti të mbrapsht, ndërmendim fuqinë që gjetëm për t’ia dal, do t’ia dalim gjithmonë.
E kam thënë vazhdimisht gjatë gjithë kësaj kohe, dua ta mbyll edhe sot me urimin më të vyer; të keni shëndet të mirë dhe të dashurit pranë! Në vigjilje të së resë, mos të qajmë të vjetrën por t’i gëzohemi jetës, edhe kur na qesh edhe kur na lëndon, sepse të gjitha janë të sajat. Do të ringrihemi, siç kemi bërë gjithmonë sepse Vlora mundet, e gjithë Shqipëria mundet! GËZUAR! Nga kryebashkiaku Dritan Leli
