Detaje të reja janë zbardhur në lidhje me dy shpërthimet me tritol që tronditën Shkodrën në mesnatë. Nga informacionet e deritanishme bëhet me dije se kamerat e sigurisë të ambienteve përreth ku kanë ndodhur shpërthimet kanë filmuar një person të veshur me kostum sportiv.
Ky person është afruar pranë godinës tre katëshe përballë prefekturës ne pedonalen e Shkodrës, ka vendosur tritolin ne portën hyrëse, dhe është larguar me shpejtësi në drejtim të sheshit të Piacës me vrap.
Pak minuta më pas një shpërthim i fuqishëm është regjistruar në godinën që ka në pronësi Xhemal Bushati, ish-kandidati i PD për kryebashkiak të Shkodrës.
Tritoli është vendosur në një butik rrobash i cili është dhënë me qira nga Bushati ndërsa në katet tjera të godinës jeton edhe familja e tij. Policia është ende duke hetuar këto dy shpërthime të cilat dyshohet se kanë lidhje me njëra tjetrën por ende asnjë rezultat.
Policia e Shkodrës ka marrë në pyetje administratorin e biznesit tjetër ku ndodhi shpërthimi me eksploziv, por edhe pronarin e godinës Xhemal Bushati për të mësuar për konlfikte të mundshme por ato janë mohuar kategorikisht.
