Ekspertët hungarezë të cilët ndodhen në Shqipëri për vlerësimin e dëmeve të shkaktuara nga tërmeti i 26 nëntorit, inspektuan sot godinat arsimore në zonën e Njësisë Nr. 8 në kryeqytet. Gjatë këtij inspektimi ishte dhe deputeti i PS-së, Ervin Bushati, drejtuesit e shkollave dhe administratori i Njësisë Nr.8, Dritan Dango për t’i risiguruar prindërit që fëmijët e tyre janë të sigurt në ambientet e shkollave. Inspektimet u zhvilluan në shkollën 9-vjeçare “Skënder Caci”, ku drejtuesja e këtij institucioni, Dorina Sulçe u shpreh se se “me ndërhyrjen e deputetit të zonës 8, Ervin Bushati, i cili bëri të mundur ardhjen e inxhiniereve hungarezë për inspektimin e shkollës tonë, u konstatua se shkolla nuk përbën rrezik për nxënësit. Ditët në vijim do ju paraqes dhe Akt-Konstatimin nga ana e tyre”.
Një tjetër godinë arsimore që u morë në inspektim ishte dhe Instituti i Nxënësve që nuk Shikojnë, “Ramazan Kabashi” . Kjo godinë ishte inspektuar në vlerësimin që ju bë dëmeve të shkaktuara nga tërmeti i 21 shtatorit. Për të risiguruar që të mos kishte ambiente të pasigurta për nxënësit e këtij institucioni, u bë vlerësimi i ndërtesës.
Drejtuesi i këtij institucioni, Emiliano Lule tha se “nga inspektimi i kryer nga ekspertët hungarezë, rezultoi që shkolla është në gjendje të mirë, dëmtime ka pasur vetëm në sistemin e ngrohjes me kaldaja si dhe plasaritje të mureve ekzistuese. Masa alternative janë ndërmarrë duke instaluar kondicioner në klasat për ngrohje, ndërkohë që punohet për riparimin e sistemit të Kaldajave”.
Deputeti i mazhorancës, Ervin Bushati i pranishëm në çdo vlerësim të godinave u shpreh se “vëmendja maksimale është për institucionet e arsimit. “ Duke falenderuar dhe shprehur mirënjohje pafund miqve tanë hungarezë, për të siguruar që godinat nuk kanë dëmtime nga tërmeti. Ringrihemi më të forte”, thekson Bushati. Administratori i njësisë, Dango deklaron se inspektimet dhe vlerësimet në terren do vazhdojnë deri sa të gjithë banorët e njësisë të ndihen të sigurt për banesat e tyre.
