Presidenti turk Rexhep Tayipp Erdogan ka kërcënuar se do të mbyllë dy baza ushtarake strategjike të përdorura nga Shtetet e Bashkuara në Turqi, nëse Uashingtoni vendos sanksione kundër Ankarasë për blerjen e një sistemi raketash ruse. “Ne do t’i mbyllim Incirlikun dhe gjithashtu Kurecikun,” i tha Presidenti turk duke iu referuar dy bazave ushtarake të përdorura nga Shtetet e Bashkuara. “Po të zbatohet kundër nesh kërcënimi i sanksioneve, ne do t’u përgjigjemi atyre në kuadrin e reciprocitetit.”
Ligjvënësit amerikanë kanë bërë presion ndaj presidentit amerikan Donald Trump që të vendosë sanksione ndaj Turqisë për blerjen dhe vendosjen e sistemit të mbrojtjes raketore S-400 të Rusisë, për të cilin Uashingtoni thotë se është i papajtueshëm me NATO-n dhe kërcënon avionët luftarakë F-35. Marrëdhëniet midis dy aleatëve të NATO-s gjithashtu janë tendosur në lidhje me ndërhyrjen ushtarake të Turqisë në verilindje të Sirisë kundër forcave kurde, që janë partnerë me SHBA kundër ISIS-it si dhe pasi Senati dhe Dhoma në Kongresin amerikan votuan pro njohjes së vrasjes së armenëve në vitin 1915 si gjenocid. I.C./Shqiptarja.com
