Federata e Futbollit e Spanjës (RFEF) e ka bërë të qartë se nuk do të marrë asnjë përgjegjësi për çështjen e sigurisë gjatë El Clasicos mes Barcelonës dhe Real Madridit më 18 dhjetor.
RFEF i bëri këto komente përmes një komunikate, të cilën e publikoi pas një takimi në të cilin nuk morën pjesë as Barcelona, as Real Madridi të mërkurën. “RFEF nuk merret me çështjet e sigurisë, njëlloj si në çdo ndeshje tjetër në garat zyrtare dhe, duke qenë spektator publik, nuk mban asnjë përgjegjësi për sigurinë”, thuhet në njoftimin e organit qeverisës së futbollit spanjoll.
El Clasico i parë i këtij sezoni duhej të luhej muajin e kaluar, por është shtyrë për 18 dhjetor për shkak të sigurisë në Katalonjë. Muajin e fundit pati protesta të dhunshme në Katalonjë, prandaj zhvillimi i një ndeshje me rivalitet kaq të madh u pa si rrezik për sigurinë në vend.
