Një grua ka gjetur tragjikisht vdekjen pasi ka rënë nga dritarja nga kati i dytë teksa ishte duke larë xhamat. Ngjarja sipas policisë, ka ndodhur rreth orës 11:50, në lagjen “ 29 Nëntori” Fier. 50-vjeçarja Roza Deliu, ka rënë nga kati i dytë i pallatit dhe ka gjetur vdekjen në vend.
Roza Deliu ishte mësuese në shkollën “Mark Dashi”.
“Sot me zemrën që na dridhet dhe mendjen që nuk e beson e nuk e rrok dot lajmin që s’do të donim t’a merrnim kurrë, ju bëjmë me dije se kolegia jonë e shtrenjtë, mikja jonë e çmuar, gruaja e vlerë dhe mësuesja e palodhur, Roza Deliu, u largua nga jeta duke na lënë një zbrazëti të madhe. Nuk është e lehtë për ne, stafin e shkollës të ndajmë me ju këtë lajm të zi e të rëndë sepse Roza për ne ish dhe është e shtrenjtë dhe e pazëvendësueshme. Ngushëllimet tona më të ndjera familjes së saj të mrekullueshme dhe gjithë të afërmve të tjerë.
Lamtumirë, gruaja me sytë e bukur, të qeshur e të gjallë, mësuesja që kurrë s’u lodh e dha më të mirën, kolegia e dashur e gjithnjë fjalëëmbël! Lamtumirë, e bukura dhe e mira Roza që qysh tani na mungon e të ardhtë e lehtë lëndina!”, është një mesazh i ndjerë i kolegëve të saj të shkollës “Mark Dashi” “Grupi hetimor po punon për zbardhjen e plotë të ngjarjes”, thotë policia në një njoftim paraprak.
