Rikonstruksioni i godinës nr.1 të studentëve, Korçë po përparon ndërsa punimet kanë hyrë në fazën e shtrimit me pllaka. Fondi Shqiptar i Zhvillimit njoftoi se punimet vijojnë me ritëm të lartë , ku aktualisht po kryhet shtrimi me pllaka (në dhoma, korridore dhe tualete). Sipas Fondit Shqiptar të Zhvillimit, po ashtu në fokus janë edhe proceset e tjera si: fino, patinim, kryerja e instalimeve elektrike dhe hidraulike, vendosja e dyerve dhe xhamave.
Ka përfunduar vendosja e mermerëve në parmakët e verandës dhe po vendosen në dritaret e katit përdhe. Lyerja në ambientet e brendshme, si dhe grafiato në fasadën perëndimore të objektit po i japin një pamje të re, totalisht të rinovuar. Synimi është krijimi i ambienteve të brendshme komode, me punime cilësore në raport me kërkesën për kushte më të mira. Kjo ndërhyrje me financim të Qeverisë Shqiptare është në vijim të ndërhyrjeve, për rikonstruksion në godinat e studentëve paralelisht dhe në qytetet Vlorë dhe Shkodër.
