Turistë vendas dhe të huaj po zgjedhin Drinin e Zi si një destinacion turistik për t’u eksploruar. Ministri i Turizmit dhe Mjedisit, Blendi Klosi ka publikuar pamje nga ky atraksion turistik teksa shprehet se edhe pse është ende pak i njohur, vizitorët po shtohen nga dita në ditë. “Drini i Zi buron prej Shën Naumi në Maqedoni dhe ngjitet lart duke gjarpëruar me shumë degëzime nëpër fshatrat e Dibrës, duke krijuar panorama të mrekullueshme”, shprehet Klosi.
Drini i Zi buron nga Liqeni i Ohrit, nga një lartësi mbidetare prej 695 m, ndërsa del nga territori i Maqedonisë së Veriut në afërsi të qytetit të Dibrës në lartësi mbidetare 476 m. Gjatësia e përgjithshme e lumit është 149 km, dhe brenda Maqedonisë së Veriut lumi është i gjatë 56 km. Lumi rrjedh në veri në drejtim të qytetit të Dibrës në një zonë malore, ku pastaj e shënon një pjesë të kufirit të Maqedonisë së Veriut – Shqipëri, për të kaluar pastaj në territorin e Shqipërisë. Pranë qytetit të Kukësit Drini i Zi bashkohet me Drinin e Bardhë duke formuar lumin e bashkuar Drini që ka derdhje në Detin Adriatik.
