Juristi i Federatës Shqiptare të Futbollit, Aldi Topçiu ka hedhur dritë rreth çështjes gjyqsore që ka nisur mes Federatës dhe Drejtorisë së Tatimeve, për shkak se kjo e fundit nuk ka shlyer TVSH-në në institucionin më të madh të futbollit në vend si pjesë e projektit të “Arenës Kombëtare”.
Në një lidhje telefonike me “Ora News”, Topçiu pohoi se çështja ka përfunduar në Gjykatën Administrative të Tiranës, teksa shtoi se kjo çështje nuk do të ndikojë në afatet e përfundimit të impianit modern.
“Ajo që di dhe mund të them është që aktualisht kjo është një çështje që po gjykohet përpara Gjykatës Administrative të Tiranës nga ana e Federatës ose më saktë nga ana e institucionit kuqezi, ku Federata është aksionere në shumicën e saj. Është bërë objekt gjykimi përpara Gjykatës dhe jemi në proces për shfuqizimin e vlerësimit përkatës me anë të së cilës Federata nuk është kompensuar me vlerat e pritura prej TVSH-së.
Shtyrja e afateve të “Arenës Kombëtare”? Unë kam besim se me këtë ritëm punimesh që po vazhdon stadiumi do të përfundojë në afatet e premtuara. Nuk e di nëse kjo çështje gjyqsore do të ndikojë drejtpërdrejtë në përfundimin e tij. Megjithatë kuptohet që është një vlerë e konsiderueshme, e cila në mos në përfundimin e stadiumit në tërësi do të ketë impakt në disa gjëra të vogla të projektit. “-tha Topçiu. oranews
