I pyetur për një ftesë të mundshme për opozitën jashtë parlamentit dhe nëse 2020 do e zgjidhë krizën politike, kryeministri Rama u tregua mjaft i hapur për gazetarët. Në një prononcim për mediat, ai hodhi thumbin e radhës, duke thënë se qeveria është votuar për të qeverisur, e jo për të pritur që Basha të zgjohet nga gjumi.
“PD e ka marrë vendimin vetë për t’u larguar nga Parlamenti, dhe me këtë ka dëmtuar rëndë veten e saj. Por qeveria është votuar për të qeverisur, e jo për të pritur të zgjohen të tjerët nga gjumi”, deklaroi Rama.
Për të, PD duhet të ishte në Kuvend. Por Rama la të hapur mundësinë për tu ulur në tryezë me palën kundërshtare. “Unë mendoj që vendi s’ka vakum, s’ka se Kuvendi funksionon. Procesi legjislativ ecën, ne reformat po i cojmë përpara me prioritete që kemi përcaktuar. Do ishte mirë që PD të ishte në Parlament, ka marrë vendimin e vet të iki, është një vendim që tregon se ka dëmtuar rëndë vetë PD padyshim që s’e ka bërë më të mirë jetën politike të vendit. Por nuk është se e ka cënuar për mosfunksionim, mund të funksiononte më mirë. Por gjithmonë nuk ka diskutim që ne jemi të gatshëm të ulemi në tryezë, të diskutojme të dëgjojmë, reflektojmë kur ka ide pozitive. Por ne jemi të votuar e dënuar të udhëheqim. S’jemi për të pritur që dikush të zgjohet nga gjumi apo të përfundojnë shtriqjen para se të vijnë në punë”.
