Pavarësisht modernizmit, në shumë vende dasmat respektojnë ende shumë elementë të traditës shekullore. Në Kinë, tradita e dasmave e qujtur “Naohun”, përmban disa elementë që tashmë po konsiderohen të tepruara. Kështu një nga traditat është që shoqëria i bllokon nuses derën e shtëpisë, për ta penguar dhëndrin të futet brenda. Ai duhet të përpiqet me çdo kusht që të futet brenda. Qoftë edhe duke e shkallmuar derën. Kur teprohet, këto lojëra që synojnë në thelb të shkaktojnë një atmosferë gazmore, degradojnë në akt dhune. Po sipas traditës, çifti shoqërohet tek dhoma e gjumit ku do të konsumojnë martesën, dhe të ftuarit i nxisin të nisin të puthen dhe përqafohen.
Gjatë natës së dasmës, anëtarët e familjes mund të qëndrojnë jashtë derës dhe të dëgjojnë “aktivitetin e çiftit në shtrat”. Një traditë shumë e përhapur në disa rajone të Kinës, është hedhja e nuses në ujë. Një traditë e rrezikshme është ajo e të qëlluarit të nuses me shigjeta pa majë, por që shpesh përfundon me lëndime. Të qarët me plan, është një tjetër traditë, ndërsa diçka e ngjashme ka ndodhur dhe ndodh edhe në Shqipëri. Lojërat që bëhen në dasmë sa vijnë e bëhen më ekstreme, dhe gjithnjë e më shumë me përmbajtje seksuale. Sipas një sondazhi, 70 për qind e kinezëve ndjehen të turpëruar nga tradita “Naohun” e dasmave. Ndaj autoritetet po mendojnë të marrin masa për kufizimin e disa prej tyre.
