Ditën e sotme u arrestua nga ana e policisë një prej organizatorëve të tragjedisë së Butrinit ku humbën jetën pesë persona, në tentativë për të kaluar kufirin me Greqinë.
Një prej viktimave ka qenë dhe 20-vjeçari nga Fieri Festim Hoxha, prindërit e të cilit ende nuk e kanë kaluar tronditjen.
Babai i tij në një rrëfim për Fax News, shprehet se edhe pse kanë kaluar vite nga ajo ditë për të ende vijon të jetë e freskët dhimbja. Ai thotë se e gjithë jeta dhe mundi i tij kanë shkuar dëm, ku nuk ka të birin prapë.
E ëma e djalit thotë se e ndjente se diçka do të ndodhte dhe nuk kanë dashur që djali i tij të shkonte drejt Greqisë, pasi edhe dy herë më parë e kishin kapur policët. Ajo tregon se e ka porositur nipin e saj që t’ia kishte amanet të birin, që të mos i ndodhte gjë.
‘’I thashë djalit të motrës amanet djalin, unë sikur e ndjeva dhe nuk doja që ta lija të ikte. Na mori në telefon ditën e dytë dhe po qante, djali thoshte se nuk e linin që të kthehej në shtëpi, pasi i kishin vënë pistoletën kokës. Në atë momente ne e marrim prapë në telefon dhe nuk na e hapi, siç duket kishte rënë në ujë.
Pastaj doli në televizor se çfarë kishte ndodhur, doli emri i asaj nuses dhe vajzës së vogël. Kur pashë emrin e djalit në televizor, kalova në depresion. Shkuam në Sarandë dhe na tha mjeku ligjor se djali ishte i mbytur, s’kishim çfarë të bënim më. Një djalë të vetëm kishim, unë e plaku jemi të dy si mos më keq, atëherë na dhanë shumë premtime. Nuk ndjehemi të qetë për arrestimin”, shprehet e ëma e Festimit.
Në Tetor të vitit 2008 në liqenin e Butrintit, shtetasi Albert Gega në bashkëpunim me 5 shtetas të tjerë, ka ndihmuar për të kaluar në mënyrë të paligjshme 22 persona ku 5 prej të cilëve u mbytën në liqen. Gjykata e Sarandës e ka dënuar këtë shtetas me 10 vjet burg, për veprën penale “Ndihma për kalimin e paligjshëm të kufijve” parashikuar nga Neni 298 i Kodit Penal.
Viktimat
Elvira Jaho – 22 vjece nga Lapardhaja e Beratit
Klara Jaho – 3 vjece e bija
Festim Hoxha – 20 vjec nga Vidhishti i Fierit
Amarildo Kuka – 25 vjec nga Komani i Fierit
Ndricim Myftari – nga Imshti i Lushnjes
