Jack Nicholson i jep fund karrierës në Hollywood? Michael Douglas zbulon të vërtetën për aktorin 89-vjeçar
Aktori legjendar i Hollywood-it, Jack Nicholson, duket se nuk do të rikthehet më në ekran, pas më shumë se 16 vitesh larg projekteve të reja filmike. Miku i tij, aktori Michael Douglas, ka zbuluar se 89-vjeçari është mirë, por është tërhequr nga jeta publike dhe aktiviteti në kinema.
“Është mirë. Është tërhequr nga jeta publike. E kuptoj, ai e meriton”, është shprehur Douglas, duke lënë të kuptohet se një rikthim i Nicholson në ekran është pak i mundshëm.
Paraqitja e fundit e aktorit në një film ishte në vitin 2010, në komedinë romantike How Do You Know, ku interpretoi përkrah Reese Witherspoon, Owen Wilson dhe Paul Rudd.
Në vitin 2013, Nicholson kishte treguar se nuk ndiente më të njëjtën dëshirë për të qenë në qendër të vëmendjes, duke theksuar se do të pranonte të merrte pjesë vetëm në projekte që trajtonin emocionet dhe ndjenjat njerëzore.
Pavarësisht karrierave të gjata në Hollywood, Nicholson dhe Douglas nuk kanë interpretuar asnjëherë së bashku në një film.
Dalja e fundit e rëndësishme publike e Nicholson ishte në 50-vjetorin e emisionit Saturday Night Live, ku prezantoi në skenë komedianin Adam Sandler.
Edhe pse nuk ka një njoftim zyrtar për pensionimin e tij, deklaratat e Michael Douglas sugjerojnë se një prej ikonave më të mëdha të kinematografisë botërore po shijon jetën larg kamerave dhe industrisë së filmit.
