Pritet me vëmendje vendimi i gjykatës për Krimet e Rënda në ngarkim të ish-ministrit të Brendshëm, Saimir Tahiri. Treshja gjykuese e përbërë nga Ardit Mustafaj, Flora Hajredinaj dhe Irena Gjoka ka në dorë atë që njihet edhe si ‘Gjyqi i vitit’.
Por kush janë 3 gjyqtarët dhe dosjet e bujshme që ata kanë patur nëpër duar?
Flora Hajdredinaj
Gjyqtarja Flora Hajredinaj, është kryesuesja e treshes së gjyqtarëve që do të shqyrtojë edhe dosjen e Eskobarit të Ballkanit, Klement Balili. Klement Balili u vetëdorëzua në janar pas dy vjetëve kërkimi nga policia, ndërkohë që Hajredinaj bashkë me Ardit Mustafajn dhe Liliana Bakun do të vendosin për të. Gjyqtarja Hajredinaj njihet edhe si gjyqtarja e Dritan Zaganit, ‘armikut’ më të ashpër të Saimir Tahirit. Ishte ajo që vendosi për Zaganin, masën e sigurisë “arrest me burg në mungesë”.
Gjyqtari Ardit Mustafaj, është sërish një nga tre gjyqtarët që do të vendosë për “Eskobarin e Ballkanit”, Klement Balili. Por mbi Mustafajn, është një tjetër çështje më e bujshme që e ka identifikuar në publik.
Bëhet fjalë për vendimin që i dha lirinë Arben Frrokut, i dënuar tashmë si vrasësi i komisarit Dritan Lamaj. Ardit Mustafaj, Dritan Hallunaj, Klodian Kurushi, Fran Prendi, dhe Liliana Baku ishin 5 gjyqtarët që e shpallën të pafajshëm Frrokun, lanë pa autor vrasjen e Dëshmorit të Atdheut dhe i dhanë atij mundësinë të arratisej jashtë Shqipërisë. Ende dhe sot nuk ka një përgjigjie për publikun shqiptar, sesi u mor ai vendim që u cilësua skandaloz. Vendimi u mor në vitin 2015, dhe ende sot, Arben Frroku nuk ka vuajtur dënimin që i takon.
Por më herët, gjyqtari Ardit Mustafaj ka rënë pre edhe e një kërcënimi. Bëhet fjalë për ngjarjen e datës 9 shtator 2012, ku poshtë derës së apartamentit të gjyqtarit Ardit Mustafaj është hedhur një letër kërcënuese. Letra është hedhur pikërisht, në të njëjtën ditë, kur një vit më parë, (9 shtator 2011) u ekzekutua gjyqtari i Gjykatës së Vlorës Skerdilajd Konomi. Në të ishte shkruar “… Tërhiqu nga çështja sa nuk është vonë, mos u bëj palë me të tjerët por tërhiqu…” .
Irena Gjoka
Gjyqtarja Irena Gjoka, njihet si një nga gjyqtaret që mori vendimin për dënimin e përjetshëm të autorit të masakrës së vitit 2009 ku u vranë 4 policë, Dritan Dajti. . Gjoka u emërua nga presidenti Bujari Bujar Nishani në gjykatën e Apelit të Krimeve të Rënda.
