“Shqipëria është ende e tronditur nga pasojat e tërmetit të 26 nëntorit, humbja e 51 jetëve njerëzore dhe dëmet e konsiderueshme në ndërtesat e banimit e të shërbimeve publike. Nga kjo ngjarje duhet të nxjerrim mësime”.
Kështu deklaroi Kryetari i Kuvendit, Gramoz Ruçi, i cili përshëndeti sot në ceremoninë e ndarjes së bursave “100 vjetori i parlamentarizmit shqiptar” studentëve të Universitetit “Marin Barleti”. Kjo ceremoni u organizua në kuadrin e bashkëpunimit të Kuvendit të Shqipërisë me Universitetin “Marin Barleti” si edhe në kuadrin e programit të veprimtarive për 100 vjetorin e parlamentit të parë shqiptar.
Në përshëndetjen e tij, Ruçi, nënvizoi se, “100 vjetori i Kongresit historik të Lushnjës dhe i themelimit të parlamentarizmit shqiptar, të cilën do ta festojmë në 21 janar të vitit të ardhshëm, është një ngjarje me rëndësi madhore kombëtare. Nga ai kongres mori jetë konsolidimi i Shqipërisë së pavarur e parlamentare, çka u mishërua në krijimin e Këshillit të Lartë, Senatit, Qeverisë, Statutit të shtetit shqiptar dhe caktimit të Tiranës si kryeqytet i Shqipërisë. Bursat që ju jepni sot janë një nderim për këtë ngjarje të shënuar historike kombëtare”.
