Rikthimi i normalitetit të ri me kufizime të arsyeshme fillon nga vetëdija e çdo qytetari. Kryeministri Edi Rama në një reagim në Facebook thotë se vazhdon të mbetet meraku i sjelljes individuale. “Kjo e dielë e bukur me frymëmarrje më të qetë, do të pasohet nga lehtësime të vazhdueshme në vijim, por mbetet meraku i madh i sjelljes individuale sipas rregullave të mbrojtjes së shëndetit për veten, familjen, shoqërinë!
Deri në daljen e vaksinës, e gjithë bota po shkon drejt një normaliteti të ri, me kufizime të arsyeshme që fillojnë nga vetëdija njerëzore e qytetare e secilit prej nesh”. Rama kërkon që t’i kushtohet vëmendje shëndetit, në mënyrë që të mos rikthehemi mbrapsht.
“Kemi një bilanc fantastik deri këtu, të arritur së bashku dhe është e pajustifikueshme që të kthehemi mbrapsht, si pasojë e mungesës së vëmendjes ndaj shëndetit. Kalofshi sa më mirë dhe më e mira do të bëhet, me durim, mirëkuptim, bashkëpunim, për familjet tona dhe për Shqipërinë.”
