Parlamenti Evropian dënon dhunën në protestat në Shqipëri: Hetim për përdorimin e forcës nga policia dhe thirrje për dialog
Parlamenti Evropian ka shprehur shqetësim të thellë për zhvillimet e fundit në Shqipëri, duke dënuar dhunën gjatë protestave në Tiranë dhe duke kërkuar hetim për raportimet mbi përdorimin e tepruar të forcës nga policia.
Në një deklaratë të përbashkët të publikuar në Bruksel, kryetari i Delegacionit të Parlamentit Evropian për marrëdhëniet me Shqipërinë, Marco Tarquinio, dhe raportuesi i përhershëm për Shqipërinë, Andreas Schieder, dënuan sulmet ndaj institucioneve publike dhe dëmtimin e pronës publike e private.
Eurodeputetët u bënë thirrje protestuesve të tregojnë vetëpërmbajtje dhe të distancohen nga aktet e dhunës, duke theksuar se dhuna nuk ka vend në një shoqëri demokratike.
“Ne dënojmë përshkallëzimin e dhunshëm të këtyre protestave, sulmet ndaj institucioneve publike dhe shkatërrimin e pronës publike dhe private. U bëjmë thirrje protestuesve të ushtrojnë vetëpërmbajtje maksimale dhe të përmbahen nga çdo akt dhune”, thuhet në deklaratë.
Shqetësim për përdorimin e forcës nga policia
Përfaqësuesit evropianë shprehën gjithashtu shqetësim serioz për raportimet mbi përdorimin e mundshëm të tepruar të forcës nga efektivët e Policisë gjatë menaxhimit të protestave.
Ata kërkuan që autoritetet të tregojnë vetëpërmbajtje dhe organet kompetente të hetojnë çdo shkelje të mundshme, me qëllim përcaktimin e përgjegjësive individuale.
“U bëjmë thirrje autoriteteve të tregojnë vetëpërmbajtje dhe organeve përkatëse të bëjnë çmos për të përcaktuar përgjegjësinë individuale për çdo akt dhune, përfshirë përdorimin e tepruar të forcës”, theksohet në deklaratë.
Të rinjtë kanë të drejtë të protestojnë
Në deklaratë nënvizohet se liria e shprehjes dhe e tubimit paqësor janë të drejta themelore të mbrojtura nga legjislacioni evropian dhe ndërkombëtar.
Sipas eurodeputetëve, të rinjtë kanë të drejtë të shprehin pakënaqësitë dhe shqetësimet e tyre, veçanërisht kur ato lidhen me çështje që ndikojnë drejtpërdrejt në të ardhmen e tyre.
Për këtë arsye, ata i kërkuan autoriteteve shqiptare të garantojnë ushtrimin e lirë të së drejtës për protestë paqësore.
Thirrje për dialog dhe respektim të shtetit të së drejtës
Në përfundim, Marco Tarquinio dhe Andreas Schieder kërkuan nisjen e një dialogu paqësor, konstruktiv dhe të sinqertë mes të gjitha palëve, për të adresuar shqetësimet e ngritura nga protestuesit.
Ata rikujtuan se respektimi i shtetit të së drejtës dhe i standardeve demokratike mbetet një kusht thelbësor për përparimin e Shqipërisë në procesin e anëtarësimit në Bashkimin Evropian.
“Respekti për sundimin e ligjit mbetet kriteri kryesor dhe kushti i detyrueshëm për përparimin e Shqipërisë në rrugën e saj të anëtarësimit në Bashkimin Evropian”, përfundon deklarata e përbashkët.
