Operacioni “Blindi” në Laç/ Arrestohen dy persona, lëviznin me BMW të blinduar, sekuestrohen drogë, jelek antiplumb dhe shpatë

Dy persona janë arrestuar në flagrancë në Laç, në kuadër të operacionit policor të koduar “Blindi”. Ata u kapën duke lëvizur me një automjet luksoz të blinduar, tip “BMW”.

Në pranga ranë E. Picaku, 35 vjeç, dhe Z. Kolndreu, 31 vjeç, të dy banues në Laç.

Sipas Policisë, nga verifikimet rezultoi se 35-vjeçari E. Picaku kishte shkelur masën e sigurisë “Arrest në shtëpi”, të caktuar nga Gjykata e Apelit Tiranë, për veprën penale “Prodhimi dhe shitja e narkotikëve”.

Gjatë kontrollit fizik të pasagjerit, Z. Kolndreu, shërbimet e Policisë gjetën një sasi lënde të dyshuar narkotike Cannabis Sativa. Ndërsa gjatë kontrollit në banesë u gjetën një jelek antiplumb dhe një armë e ftohtë, konkretisht një shpatë.

Policia sekuestroi automjetin e blinduar, për të cilin dyshohet se është përfituar nga të ardhura me burime të dyshimta, lëndën e dyshuar narkotike, sendet e kundërligjshme dhe tre telefona celularë.

Operacioni u zhvillua nga specialistët e Seksionit për Hetimin e Narkotikëve, në bashkëpunim me Seksionin e Mbështetjes Operacionale për Hetimin, Forcën e Posaçme “Shqiponja” dhe Komisariatin e Policisë Kurbin.

Materialet procedurale i janë referuar Prokurorisë për veprime të mëtejshme, ndërsa hetimet vijojnë për dokumentimin e plotë të veprimtarive të dyshuara të kundërligjshme.